སློབ་གསོ།         སྐད་ཡིག         རྩོམ་རིག        ཆོས་ལུགས།        སྒྱུ་རྩལ།        གསོ་རིག        དམངས་སྲོལ།        དཔེ་དེབ།         སྒྲ་བརྙན།        པར་མཛོད།         གློག་རྡུལ་དུས་དེབ།         དྲི་བ་འདོན་ས།       
 
 
ལུགས་ཟུང་བ་དན་གཡོ་བའི་ལེགས་བཤད་རླུང་གི་བསྟན་བཅོས་ཞེས་བྱ་བ་བཞུགས་སོ།
སྤེལ་དུས། 2016-05-10   ཡོང་ཁུངས། ཀྲུང་གོའི་བོད་ལྗོངས་དྲ་བ།   རྩོམ་པ་པོ།  དཀྱིལ་ཟུར་བློ་བཟང་སྦྱིན་པ།

ཨོཾ་བདེ་ལེགས་སུ་གྱུར་ཅིག  ལུས་ཅན་ཀུན་གྱི་ནོར་འཛིན་ལ།  །བྱམས་བརྩེའི་གྲིབ་བསིལ་རྟག་སྙོམས་པའི། །སངས་རྒྱས་དཔག་བསམ་ལྗོན་པ་དེ།  དད་པའི་རླུང་གིས་བསྐྱོད་དེ་བསྔགས།  །ཚོགས་གཉིས་མཐར་སོན་སངས་རྒྱས་དེའི།  །སྐུ་གཉིས་མངོན་དུ་བྱེད་པའི་ཐབས།  །ལུགས་གཉིས་བླང་དོན་གཡོ་བའི་རླུང་།  །དོན་གཉིས་འགྲུབ་ཕྱིར་འདི་ན་སྤྲོ།  །དོན་བཟང་ཚིག་སྦྱོར་ཕུན་ཚོགས་པའི།  །ལེགས་བཤད་གཏམ་གྱིས་གཞན་ཡིད་འཕྲོག།  དྲི་ཞིམ་འཕྲོ་བའི་པད་ཚལ་གྱི།  །།རླུང་གིས་སྣ་དབང་ཚིམ་པ་བཞིན།  །སྐྱེ་བོ་ཀུན་དང་མཐུན་ཕྱིར་དུ།  །དག་སྣང་སྦྱོངས་ལ་འགྲོགས་བདེ་བགྱི།  །ཆར་ལྡན་རླུང་གི་ཤིང་རྟ་ལ།  །འཇིག་རྟེན་ཐམས་ཅད་དགའ་བ་ཡིན།  །སྐྱིད་སྡུག་ལེགས་ཉེས་ཅི་འབྱུང་བ།  །།སྔོན་བསགས་ལས་ཀྱི་འབྲས་བུ་སྟེ།  །རླུང་གིས་ཆུ་དཀྱིལ་བསྲུབས་པ་ལས།  །རི་གླིང་ཁོར་ཡུག་རིམ་པར་ཆགས།  །ཕུགས་སུ་ཕན་པའི་དོན་ཆེན་དེ།  །ངང་རིང་འབད་པས་བསྒྲུབ་པར་བྱ།  །ལོ་སྟོང་དུ་མར་རླུང་གཡོས་པས།  །འོག་གཞི་རླུང་གི་དཀྱིལ་འཁོར་གྲུབ།  །རང་བགཞན་སུ་ལའང་མི་ཕན་པའི།  །བྱ་བ་ངན་པ་བཤོལ་ན་ལེགས།  །དགུན་གྱི་ཁ་རླུང་འཚུབ་དུས་སུ།  །ས་བོན་བཏབ་ཀྱང་ཕན་པ་མེད།  །བྱ་བ་གང་དང་གང་བྱེད་ཀྱང་།  །འགྲུབ་དང་མི་འགྲུབ་བརྟག་ནས་བྱ།  །རྩྭ་དང་ནས་སྲན་ཕྱེ་བའི་ཚེ།  །རླུང་བོ་འབྱུང་མིན་བརྟག་ནས་བྱ།  །མཆོག་གསུམ་མཆོད་ཅིང་གསོལ་བཏབ་ན།  །གང་བརྩམས་བྱ་བ་ཡིད་བཞིན་འགྲུབ།  །།སྟོན་དུས་རླུང་གིས་རྩྭ་དང་འབྲུ།  སོ་སོར་ཕྱེ་ན་འདོད་དོན་འགྲུབ།  །གཏམ་ལ་མཚོན་ཆ་མེད་ན་ཡང་།  །མི་སྙིང་དུམ་བུར་གཏོང་བ་དང་།  །རླུང་ལ་གཤོག་པ་མེད་ན་ཡང་།  མཁམ་ལ་འགྲོ་ཞེས་རྒན་རབས་སྨྲ།  །དེས་ན་རྩུབ་པོའི་ཚིག་སྤོང་ལ།  །བཞིན་འཛིན་འཇམ་པོའི་ཚིག་སྨྲས་ནས།  །མཐོ་དམན་འབྲིང་གསུམ་སྐྱེ་བོ་ཀུན།  །མགུ་བར་བགྱིས་ལ་བློ་མ་གཏོད།  །ཕ་རོལ་པོ་ཡིས་ཐོས་དོགས་མེད།  །སྙམ་དུ་སྐྱོན་བརྗོད་མི་བྱ་སྟེ།  །གཏམ་ནི་བྱ་སྤུ་རླུང་འཁྱེར་དང་།  །འདྲ་ཞེས་ཤ་ཚ་ཅན་རྣམས་སྨྲ།  །ཕ་རོལ་གཞན་སྐྱོན་བརྗོད་པ་ན།  །རང་ཉིད་བརླག་པའི་རྒྱུ་ཡིན་ཏེ།  །མེ་ལ་ཕར་ནི་ཕུས་གཏབ་པས།  །རང་གི་གདོང་ནི་ཚིག་པ་མཐོང་།  །དུས་ཀྱི་དབང་གིས་ཞི་དུལ་ཅན།  །མ་རབས་སྐྱེ་བོའི་ཁྲོད་དུ་གནས།  །ངན་པའི་རླུང་གིས་རྡུལ་ཁྲོད་དུ།  འཇམ་པོའི་ཤིང་བལ་འཁྱེར་བ་མཐོང་།  །ཆོས་བཞིན་སྤྱོད་པའི་སྐྱེ་བོའི་དབུས།  །ངན་པ་འཚངས་ནས་བརླག་པར་བྱེད།  །རླུང་ངན་རྩིག་སེང་ཚུན་ཆོད་ལ།  །ཞུགས་ནས་ག་བུར་རླག་པ་མཐོང་།  །དམན་པས་དམ་པ་ལ་བསྟེན་ན།  །གང་འདོད་གནས་སུ་སྐྱེལ་བ་ཡིན།  །བཟང་པོའི་རླུང་ལ་དྲིས་བརྟེན་ན།  །ཐག་རིང་ཡུལ་དུ་སླེབ་དང་མཚུངས།  །སྐྱེ་བོ་ངན་པ་འབྱོར་ཐོབ་ཚེ།།གཞན་ལ་རྣམ་འགྱུར་སྣ་ཚོགས་སྟོན།  །ངན་པའི་རླུང་ཆེན་གཡོ་རྟགས་སུ།  །འདབ་ཆགས་ཁྲུང་ཁྲུང་ཐག་སྐད་སྒྲོག །དམ་པ་ཇི་ཙམ་བསྟོད་ན་ཡང་།  །ང་རྒྱལ་ཅུང་ཟད་སྐྱེ་མི་མཛད།  །རླུང་ནི་ཇི་ཙམ་གཡོས་གྱུར་ཀྱང་།  །རྒྱ་མཚོ་ཆེ་ལ་གཡོ་འགུལ་མེད།  །ངན་པ་ཅུང་ཟད་བསྟོད་པ་ལ།  །ཁེངས་པ་རི་རབ་ལས་ཀྱང་མཐོ།  །མྱ་ངམ་ཐང་དུ་གཡོས་པའི་རླུང་།  །ཐལ་ཚུབས་གཞན་ལས་ཆེ་བ་མཐོང་།  །བློ་ཆེན་རྣམས་ལ་སྨད་གྱུར་ཀྱང་།  །རང་གི་རང་བཞིན་ག་ལ་འདོར།  །རླུང་གི་གྲོགས་པོའི་ཞུགས་ནང་དུ།  །གསེར་སྦྲམ་བཞུ་ཡང་མདོག་མི་འགྱུར།  །བློ་ཆུང་ཅུང་ཟད་སྨད་ཙམ་གྱིས།  །སྡུག་བསྔལ་གཞན་ལས་ཆེ་བ་བྱེད།  །ཐང་ན་གནས་པའི་སྒྲོན་མེ་དེ།  །ཆུང་ངུའི་རླུང་གིས་འཇིག་པ་ཡིན།  །དམ་པའི་ཡོན་ཏན་དང་ལྡན་གྱིས།  །མང་པོའི་ནང་དུ་སྒྲོག་པར་བྱེད།  །ཧ་རི་ཙྡན་དྲི་ངད་དེ།  །རླུང་གིས་ཕྱོགས་དང་མཚམས་སུ་འགྱེད།  །སྙིགས་དུས་སྐྱེ་བོ་ཕལ་ཆེ་བ།  །ཆོས་བྱེད་སྐྱེས་བུར་རབ་ཏུ་སྡང་།  །ཕྱོགས་མཚམས་ཀུན་ནས་གཡོས་པའི་རླུང་།  །དར་ལྕོག་དཀར་པོར་སྡང་ཞེས་ཟེར།  །ཐོས་ལྡན་ཉམས་ལེན་ལ་གཞོལ་བའི།  །མཁས་དེ་ཞི་ཞིང་དུལ་བར་གནས།  །ཚ་བའི་གདུང་བ་ཞི་བྱེད་པའི།  །བཟང་པོའི་རླུང་དེ་ཀུན་ཏུ་བསིལ།  ཐོས་མེད་མཁས་འདོད་ཅན་རྣམས་ཀྱི།  །ཤེས་རྒྱུད་རྭ་ཅོ་ལས་ཀྱང་གྱོང་།  །བར་སྣང་སྤྲིན་མེད་རླུང་བོ་དེ།  །མདའ་ལས་ཚ་ཞེས་ཀུན་གྱིས་སྨྲ།  །སློབ་གཉེར་དུས་སུ་མ་བྱས་པར།  །རྗེས་སུ་མཁས་འདོད་བཞད་གད་གནས།  །ཆར་སྤྲིན་རླུང་གིས་སྟོར་བ་ལ།  །སྦྲང་ཆར་རེ་བ་དོན་མེད་ཡིན།  །བློ་ལ་ཡར་བསྐྱེད་གཏན་མེད་པའི།། སློབ་གཉེར་ཇི་ཙམ་བྱས་ཀྱང་ཅི།  །གཤམ་བུ་རླུང་གིས་རྟག་གཡོས་ཀྱང་།  །སླེབ་རྒྱུ་གཡང་ཡང་མེད་ལ་ལྟོས།  །ཚེ་འདིའི་བདེ་འབྱོར་སྒྲུབ་ན་ཡང་།  །ཆོས་ཀྱིས་བསྒྲུབ་ན་མོད་ལ་འགྲུབ།  །རླུང་གིས་ཆར་གྱི་སྣེ་དྲངས་ཏེ།  །ཞིང་པའི་རེ་བ་སྐོང་དང་མཚུངས།  །རྣམ་བཀྲ་དོན་མེད་བྱ་བ་ཡིས།  །ཕུན་ཚོགས་སྒྲུབ་ཀྱང་ཐོབ་པར་དཀའ།  །རླུང་གིས་གཡོས་པའི་ཆུ་རིས་བཞིན།  །གྲུབ་ཀྱིན་གྲུབ་ཀྱིན་རླག་པ་མང་།  །ནོར་དང་མངའ་འབངས་རྒྱལ་པོའི་རྒྱན།  །འཆད་དང་རྩོམ་པ་མཁས་པའི་རྒྱན།  །སྟོབས་དང་གོ་མཚོན་དཔའ་བོའི་རྒྱན།  །རླུང་དང་ཆར་སྤྲིན་བསིལ་བའི་རྒྱན།  །ཁ་ཆེམས་རླུང་ལ་བསྐུར་བའི་དཔེ།  །མང་པོ་དག་གིས་བརྗོད་པ་བཞིན།  །བློ་གསལ་རྣམས་ལ་ཕན་པའི་ཕྱིར།  །བདག་གིས་ལྷག་བསམ་དག་པས་བྲིས།  །འཇིག་རྟེན་མི་ཡི་ཆོས་ལུགས་ཀྱི།  །བསླབ་བྱ་མདོར་བསྡུས་བཤད་ཟིན་ནས།  །ད་ནི་དམ་པའི་ལྷ་ཆོས་ལས།  །བྱུང་བའི་རིམ་པ་ཅུང་ཟད་འབྲི།  །ཡ་རབས་ལུགས་བཟང་སྤྱད་པ་ལས།  །ཚེ་འདིར་བདེ་འབྱོར་ཐོབ་གྱུར་ཀྱང་།  །རླུང་ལྟར་གཡོ་བའི་རང་བཞིན་དུ།  །བལྟས་ནས་ཐོས་བསམ་སྒོམ་ལ་འབུངས།  །ལམ་སྟོན་བླ་མའི་གསང་གསུམ་གྱི།  །མཛད་འཕྲིན་རླུང་གི་ཤིང་རྟའི་ཚོགས།  །མཆོག་མཐུན་ལོ་ཏོག་འགྲུབ་བྱེད་དུ།  །གསུངས་ཀྱང་སྐྱོན་དུ་བལྟ་བ་མང་།  །དམ་པས་ཐབས་ཀྱིས་སྐྱེ་བོ་རྣམས།  །ཆོས་ལ་བསྐུལ་ན་བློ་འགྱུར་ཏེ།  །རླུང་གིས་བསྐུལ་ན་སེམས་མེད་ཀྱི།  །ལྗོན་པའང་གར་སྟབས་སྣ་ཚོགས་བྱེད།  །དད་ལྡན་སྐྱེ་བོའི་ཚོགས་ནང་དུ།  །བླ་མའི་ཡོན་ཏན་སྒྲོག་པར་བྱེད།  །བཟང་པོའི་ཤིང་གི་དྲི་བསུང་རྣམས།  །རླུང་གིས་ཕྱོགས་བཅུར་རྒྱས་པར་བྱེད།  །ཕྱོགས་བཅུའི་རླུང་གིས་ཕྱོགས་ཀུན་ཏུ།  །བསྐྱོད་པའི་རྒྱ་མཚོའི་གཉའ་ཤིང་གི།  །བུ་གར་རུས་སྦལ་མགྲིན་ཆུད་ལྟར།  །མི་ལུས་ཤིན་ཏུ་ཐོབ་དཀར་གསུངས།  །དེ་ཕྱིར་དལ་འབྱོར་གྲུ་གཟིངས་འདི།  །ཉམས་ལེན་བ་དན་དཀར་པོས་བརྒྱན།  བརྩོན་པའི་རླུང་གིས་རབ་བསྐུལ་ནས།  །འཁོར་བའི་མཚོ་ལས་བརྒལ་བར་བྱ།  །ལན་གཅིག་རྙེད་པའི་རྟེན་བཟང་འདི།  །འཇིག་ཀྱང་ཤིན་ཏུ་སླ་བའི་ཚུལ།  །རླུང་དམར་ནང་གི་མར་མེ་དང་།  །མཚུངས་ཞེས་འཕགས་པ་ཀླུ་སྒྲུབ་གསུངས།  །སྤྲིན་ཕུང་རླུང་གིས་སྟོར་བ་བཞིན།  །ནོར་དང་ལོངས་སྤྱོད་བཞོན་པ་སོགས།  །ཐམས་ཅད་བོར་ཏེ་འཆི་བའི་ཚེ།  །ཕན་ངེས་དམ་ཆོས་ལས་གཞན་མེད།  །ཤི་ནས་གར་སྐྱེ་གར་འགྲོ་ནི།  རང་ལ་དབང་ཡོད་མ་ཡིན་ཏེ། །ལས་ཀྱི་རླུང་གིས་འགྲོ་བ་གཉིས།  །གང་དུ་འཁྱེར་བ་གཅིག་ཏུ་ཡིན།  །ངན་འགྲོར་སྐྱེས་ན་སྡུག་བསྔལ་ནི།  །རབ་འབར་མཚོན་ཆ་སྣ་ཚོགས་ཀྱིས།  །ལུས་ནི་དུམ་བུར་གཏོང་བ་སོགས།  །འཐོར་བྱེད་རླུང་གིས་བཅོམ་པ་བཞིན།  །འཇིགས་ཆེན་དེ་ལས་ཐར་པ་ལ།  །མཆོག་གསུམ་སྐྱབས་སུ་བསྟེན་དགོས་ཏེ།  །ནགས་ཚལ་ཆེན་པོ་མེས་སྲེག་ཚེ།  །།རླུང་ཞིག་ཅིས་ཀྱང་གྲོགས་སུ་དགོས།  །བདེ་དང་སྡུག་བསྔལ་ཇི་ཡོད་ཀུན།  །དཀར་ནག་ལས་རྣམས་སྤྱད་ལས་བྱུང་།  །སྲ་ཞིང་འཐས་པའི་རླུང་དཀྱིལ་དེ།  །སེམས་ཅན་སྤྱི་མཐུན་ལས་ལས་གྲུབ།  །དགེ་དང་མི་དགེ་ཆུང་ངུ་ལའང་།  །འབྲས་བུ་བདེ་སྡུག་ཆེར་འབྱུང་བས།  ཡིད་ཆེས་དད་པའི་རླུང་ཤུགས་ཀྱིས།  །སྡིག་སྤོང་དགེ་བ་སྒྲུབ་ལ་བསྐུལ།  །ཐོག་མ་མེད་ནས་ད་བར་དུ།  །བསགས་པའི་སྡིག་ལྟུང་ནགས་ཚལ་ཀུན།  །བརྩོན་པའི་རླུང་གིས་རབ་སྦར་བའི།  །སྟོབས་བཞིའི་མེ་ལྕེ་འབར་བས་སྲེག། མིག་སྐྱིད་བདག་པོའི་བང་མཛོད་ལ།  །འགྲན་པའི་ཚེ་འདིའི་ཕུན་ཚོགགས་ལའང་།  །སྙིང་པོ་འགའ་ཡང་མ་མཆིས་ཏེ།  །རླུང་གི་རྒྱལ་མཚན་ཇི་བཞིན་ནོ།  །འདོད་ཡོན་ནག་པོ་བརྩེགས་པ་དང་།  །འཁོར་བའི་གནས་འདི་མ་མོས་འཕེལ།  །ཟས་སུ་ཟ་བའི་དུག་སྦྲུལ་གྱི།  །ཚང་དང་འདྲ་ཞེས་མཁས་རྣམས་གསུངས།  །རྣམ་རྟོག་ཡིད་ཀྱི་མཁའ་དབྱིངས་སུ།  །འདོད་སྲེད་སྤྲིན་ཕུང་འཁྲིགས་པ་རྣམས།  །གཉེན་པོ་རླུང་གིས་མ་བཅོམ་ན།  །འཁོར་བའི་རྫོང་ལས་ཐར་ཐབས་མེད།  །དེ་ཕྱིར་བསླབ་གསུམ་འབྲས་བུ་ཡིས།  །ཡོངས་སུ་དུད་པའི་དཔག་བམས་ཤིང་།  །གྲགས་འདོད་རླུང་གིས་མ་བསྐྱོད་པར།  །རྣམ་གྲོལ་ཐར་པའི་ཚལ་དུ་ཞུགས།  །མར་གྱུར་འགྲོ་བ་སྙིང་རྗེ་ཡིས།  །ཐེག་ཆེན་རྩ་བ་བརྟན་པར་བྱ།  །རླུང་རྣམས་དལ་བུས་གཡོས་པ་ལས།  །འཇིག་རྟེན་གཞི་རྟེན་རླུང་དཀྱིལ་གྲུབ།  །དེ་ནས་རང་དོན་ཡལ་བོར་ནས།  །ཅི་བྱེད་སེམས་ཅན་དོན་དུ་བྱ།  །ལྗོན་ཤིང་རླུང་གིས་བསྐུལ་བ་ལས།  །ཆོས་ཀྱི་སྒྲ་དབྱངས་སྒྲོག་པ་ཡོད།  །རྒྱལ་སྲས་སྤྱོད་པའི་ཁུར་ཆེན་དེ།།སྙིང་སྟོབས་བསྐྱེད་ནས་ཕྲག་ཏུ་ལོངས།  །བྱེ་བ་ཕྲག་བརྒྱའི་འཇིག་རྟེན་ཁམས།  །རླུང་དཀྱིལ་ཆེན་པོ་གཅིག་གིས་འདེགས།  །ཐེག་ཆེན་སེམས་བསྐྱེད་ཀྱིས་ཟིན་པའི།  །དགེ་རྩ་མི་ཟད་འཕེལ་བར་འགྱུར།  །ས་དང་བར་སྣང་དབྱིངས་ཀྱི་རླུང་། །ཐམས་ཅད་མ་མོས་འཕེལ་བ་ཡིན།  །།སྦྱིན་པས་མཐོ་དམན་འབྲིང་གསུམ་གྱི།  །སྐྱེ་བོ་ཐམས་ཅད་བསྡུ་ནུས་ཏེ།  །སྦྱིན་ལ་རྟག་ཏུ་བརྩོན་པ་དེའི།  །གྲགས་པ་རླུང་བཞིན་ཕྱོགས་བཅུར་ཁྱབ།  །རྒྱལ་སྲས་སྤྱོད་པ་ཀུན་བསྡུས་ན།  །ཚུལ་ཁྲིམས་རིན་ཆེན་གསུམ་དུ་འདུ།  །ཡང་ཞིང་གཡོ་བའི་རིགས་གང་ཡིན།  །རླུང་གི་ཁམས་སུ་འདུ་བ་བཞིན།  །མཁས་གསུམ་སེམས་ཅན་དགྲར་ལངས་ཀྱང་།  །བཟོད་པ་སྒོམ་ན་གྲོགས་སུ་ཁུག  །མེ་ལ་རླུང་གིས་དམག་དྲངས་ཚེ།  །དེ་ཀུན་མེ་ཡིས་གྲོགས་སུ་འགུག  །རྟག་གུས་སྦྱར་བའི་རླུང་ཤུགས་ཀྱིས།  །བརྩོན་པའི་མེ་ཆེན་རབ་སྦར་ན།།ཡང་དག་ཡེ་ཤེས་སྣང་བ་རྒྱས།  །ལེ་ལོའི་བསྲེག་བྱ་མ་ལུས་ཟ།  །བྱིང་རྒོད་རླུང་གིས་མ་གཡོས་ན།  །ཏིང་འཛིན་གསལ་ཞིང་བརྟན་པ་འགྲུབ།  ཕྱོགས་མཚམས་རླུང་གིས་མ་གཡོས་པའི།  །དྭངས་པའི་མཚོ་ནང་ཟླ་གཟུགས་བཞིན།  །ཇི་སྲིད་བདག་འཛིན་མ་བཟློག་པ།  །དེ་སྲིད་འཁོར་བར་སྡུག་བསྔལ་མྱོང་།  །དབུགས་ཀྱི་རྒྱུ་བ་མ་འགག་པར།  །སྲོག་གི་དབང་པོ་གནས་པ་བཞིན།  །བདག་མེད་རྟོགས་པའི་མཚོན་རྣོན་གྱིས།  །ཉེས་བརྒྱའི་རྩ་བ་རྩད་ནས་གཅོད།  །བསྐལ་པའི་རླུང་ཤུགས་དྲག་པོ་ཡིས།  །འཇིག་རྟེན་འདི་ཀུན་འཇིག་པ་བཞིན།  །དེ་ནས་གསང་སྔགས་སྒོར་ཞུགས་ནས།  །དམ་སྡོམ་བསྲུང་བ་གཞིངགཞིརབཟུང་ན།  །རླུང་ལྟར་མགྱོགས་པའི་ས་ཆོད་ཀྱིས།  །ཟུང་འཇུག་གོ་འཕང་མྱུར་དུ་འཐོབ།  །ཐ་མལ་སྣང་ཞེན་སྦྱོང་བའི་ཕྱིར།  །རླུང་གི་རྒྱལ་མཚན་ལྟར་བཀྲ་བའི།  །རྟེན་དང་བརྟེན་པའི་དཀྱིལ་འཁོར་ལ།  །ང་རྒྱལ་གསལ་སྣང་འདོན་པར་བྱ།  །བསྒོམས་པའི་སྟོབས་ཀྱིས་རླུང་དབུ་མར།  །ཞུགས་གནས་ཐིམ་གསུམ་བྱུང་བའི་མཐར།  །ཤིན་ཏུ་ཕྲ་བའི་རླུང་སེམས་གཉིས།  །ཆོས་གཟུགས་གཉིས་ཀྱི་སྐུ་རུ་ལྡང་།  །དེ་ལྟར་རླུང་གི་ཁྱད་པར་གྱིས།  །མཚོན་བྱེད་ཚིག་གི་སྦྱོར་བ་འདི།  །ལེགས་བཤད་ཆུ་ཡི་བསྟན་བཅོས་དེ།  །མཐོང་བའི་རྐྱེན་གྱིས་བྱས་པ་ལགས།  །མཁས་དབང་དཀོན་མཆོག་བསྟན་པའི་སྒྲོན་མེའི་ལེགས་བཤད་རྒྱ་མཚོ་ཆེན་པོ་དེ།  །རྣམ་དཔྱོད་བློ་ཡི་རླུང་གིས་བསྲུབས་ལས་འཇིག་རྟེན་ཡ་རབས་སྤྱོད་ཚུལ་ནས།  །ཟུང་འཇུག་མངོན་དུ་བྱེད་པའི་བར་གྱི་ལམ་གྱི་རིམ་པ་མ་ལུས་པ།  །གཏན་ལ་འབེབས་བྱེད་བསྟན་བཅོས་འདི་ནི་སྔོན་བསགས་བསོད་ནམས་མཐུ་ལས་རྙེད།  །ཚུལ་འདིར་འབད་པའི་དགེ་བའི་མཐུས།  །ལུགས་གཉིས་བསླབ་བྱ་རླུང་བཞིན་དུ།  །འཇིག་རྟེན་ཀུན་ལ་ཡོངས་གྲགས་ནས།  །བླང་དོར་བྱེད་ལ་མཐུ་ལྡན་ཤོག། །

 
འབྲེལ་ཡོད་ནང་དོན།
 
 
Copyright @ China Tibet Online
འདིར་འཁོད་ཡིག་རིགས་དང་པར་རིས་རྣམས་ཀྱི་པར་དབང་ཀྲུང་གོའི་བོད་ལྗོངས་དྲ་བར་དབང་བས་དབང་བཅོལ་ཆོག་མཆན་མེད་པར་སྤྱོད་མི་ཆོག
E-Mail:2083958102@qq.com
ཁ་པར།:010-58336070